Amore giallorosso

 

CATANZARU: TU MU CHIEDISTI E CÀ TU DICU. CU A LINGUA NOSTRA

“E mo’do Catanzaru on dici nenta? Parri e tuttu e on t’astuti mai e de’ giallorossi on ti nescia na parola?” No, non è accussì. Parravi tanti voti comu facivanu i patri nostri , a la chiazza, strati strati a lu barru e a la casa cu fratimma e l’amici. Veramenta dopu i primi cincu partiti cu u presidenta messaggi messaggi. Ohia n’amicu da Marina a lu stadiu, assettatu  arretu e mia mi grudau :” Cimì domani a scrivi na cosa d’a squadra?” Ed eu l’accuntentu, ca mi custa puru pocu,  sui  paroli sulu. Chissi:” On vitti mai na cosa accussì! Mai na squadra comu chissa! Bella e precisa ca para n’oroluggiu svizzeru! Mai iocaturi cussi bravi. Tutti! Chi iocanu a memoria! Mai nu pubblicu e nu tifu tanti puliti e sinceri. Educati e gioiusi. Mai vitti n’allenatora com’u nustru. Unu chi on sbaglia na mossa neppure si volera. On vitti mai na partita comu chissa. Perfetta. Divertenta e spettaculara, nu cinema! Mai na squadra avversaria chi si vitta a partita gratis e chi pe’ centu minuti on toccau na  palla e on vitta a porta puru chiusa d’a marina e nu portera chi on vitti mai accussì bravu e volatura! E mai vitti, puru si mi ficia arraggiara na sira, nu presidenta accussì bellu. Bellu comu on sinda vidanu mai! Mancu a la seria A e a la coppa de’ campioni. Mai vitti nu capitani comu u nostru, campiona veru, pedi d’oru e cervedru finu. Chissu sacciu ca mu dicia u cora. E pallona on capisciu nenta e non da sacciu dira. Mi piaciva ma iocu prima ma mi iettu, guagliona, a la politica, ca sinnó u vidivi u campiona cu u numeru decia! I giudizzi boni ci lassu a cui ‘nda capiscia. Eu su cuntentu e stasera mi scialu. Atru non dicu. Chidri c’aviva e dirà u dissi già doppi i primi cincu punti.  Mo’ aspettamu e tifamu. 

Francu Ciminu